REVISTA

APLEXDIGITAL

ASOCIACIÓN CULTURAL

"ESTUDIO Y DIVULGACIÓN DEL PATRIMONIO LINGÜÍSTICO EXTREMEÑO" (APLEx) APARTADO DE CORREOS 930 - 10080 CÁCERES (ESPAÑA)

2006

Número 0

ISSN

En trámite

 

Edición en pruebas

RECENSIONES

 

Sobre la revista "Piedras con raícies"

Número 12

 

 

PABLO MUÑOZ REGADERA

Sobre la revista "Piedras con raíces"

 

 

 . . . .. .. . . . . choza

Revista recibida en la Revista Aplex Digital, marzo 2006:

Piedras con Raíces.La revista de nuestra arquitectura vernácula; Nº 12, invierno 2006. Edita: ARTE, ISSN: 1696-9499; Depósito Legal: CC-261-2002

Coordinadores: José Luis Martín Galindo, Julián Miguel Orovengua.

CONTENIDOS:

el zaguán

LA ASAMBLEA DE EXTREMADURA TUTELA LOS CHOZOS DE PIEDRA

Asociación por la Arquitectura Rural Tradicional de Extremadura

el chozo

ACERCA DE LA ESPECIFICIDAD DELA ARQUITECTURA POPULAR EXTREMEÑA. UNA APROXIMACIÓN DESDE LAANTROPOLOGIA.

Javier Marcos Arévalo

CANDALIJA, LA GARZA, CASA DE LA CHINA Y OTROS CORTIJOS DE LA BAJA EXTREMADURA.

Jose Maldonado Escribano

PUERTAS Y VENTANAS. ARQUITECTURA TRADICIONAL EN VALENCIA DE ALCANTARA

Carlos Bermejo Castro

puerta abierta

OS CANASTROS: A MEMÓRIA DE COLHEITAS PASSADAS.

Manuel Rivero Pérez

LA IMPORTANCIA DE LAS CONSTRUCCIONES EN PIEDRA SECA EN LA ESTÉTICA DEL PAISAJE DE ARDÈCHE (FRANCIA)

Michel Rouvière

RESEÑAS BIBLIOGRÁFICAS

COMENTARIO A LA PUBLICACIÓN. Pablo Muñoz Regadera.

La cultura vernácula de lah tierrah ehtremeñah moh ofreci hoy en día múltiplih ejempluh y tehtimoniuh de lo que jue la manera de vivil de loh muehtruh ancehtruh candu entavía no corrían loh cochih por lah jesah y ni siquiera loh caminuh de jierru habían ehlomau la geugrafía regiunal pa dal pasu al tren y a loh tiempuh nuevuh, aqueyuh que enterrarían sin prejuiciu segluh de labureu y cultura tradiciunal, . Aqueyuh tiempuh del burrinu y la choza d'ehcoba, tiempuh pretérituh que permanecierun entri mujotruh a pesá del progresu que moh invadía y culunizaba comu a pasuh agigantauh. En la humirdi casina del campusinu o del cabreu de finalih del seglu XX víamuh a la vez la gayina saliendu'el gayineru adusau a la vivienda familiá y l'antena de la televisión en el tejau. El mohtruo vigilandu y cundenandu tô un legau trebajau, curtivau a gorpi de ingeniu y de amor por lo muehtru.

La vía tradiciunal de loh campusinuh y ganaeruh de lah jesah y sierrah ehtremeñah necesitan el apoyu ecidíu de lah ehtitucionih que moh gobiernan y un impulsu vivificaó en cantu a la su cunservación y recuperación, si juesi prijisu. Anqui en muchuh appehtuh no bemuh sabíu valurá esi ricu legau que portadageneracionih trah generacionih juerun forjandu en loh puebluh, en loh campuh y en lah urbih de la muehtra tierra, hay ejempluh nutablih de presonah y asuciacionih que, contri vientu y marea, han trebajau para cunserval, recuperal o difundil aqueyu que moh caratteriza comu'n puebru con una ehtoria cumún ya dece antecinu de la culunización romana en lah tierrah lusitanah. Siguiendu loh pasuh de antrupóluguh como Julio Caro Baroja o Ramón Violant i Simorra, el culectivu agrupau en la asuciación ARTE (Asociación por la Arquitectura Rural Tradicional de Extremadura) y liderauh por J.L. Martín Galindo, Julián Miguel o Félix Barroso, entri otruh, ehtá yevandu a cabu una labó encumiabli c'ahora s'ha vihtu premiá con el recunucimientu de la Junta de Extremadura pa que loh chozuh sean declarauh Bien de Interés Cultural comu un Patrimoniu de la Humanidá que son y han síu dece haci ya una catarvá de añuh.

La Ehtoria, con mayúhcula, la que s'ehtudia en loh libruh, en lah ehcuelah, en lah universidadih, la ehtoria uficiá en definitiva, goza de güenuh meyiuh prupagandíhticuh, de güena prumución, y la su cunsevación corri a cargu del erariu públicu con lo que permaneci y se pruyehta hacia el futuru cuntínuamenti, y ehtá mu bien c'asín sea. Peru lo cortéh no quita lo valienti. Juntu a la ehtoria uficial dihcurri la ehtoria cutidiana, la de la genti que trebaja día a día, que pasa la vía en laborih humirdih, senciyah y hahta reiterativah, peru laborih necesariah pal desarroyu d'una cumuniá, pa la su susihtencia, pal su recunucimientu y autuehtima, laborih que cunyevan una jorma d'hacé, una jorma de sel que genera una curtura con manifehtacionih variáh en cantu a folclori y cuhtumbrih, una jorma que moh uni y defini a loh que nacimuh en ehtah bahtah y beyah tierrah c'han dau en yamá Ehtremaura.

Aplex eh ejemplu d'unah presonah con unah inquietudih vernáculah a flor de piel, con una querencia por la lengua que aun se manifiehta en ca rinconcinu aihlau de la región, con loh suh múltiplih maticih y variantih, un ejemplu d'un culehtivu de rumánticuh que se resihtin a la uniformiá a la que moh yeva la sociedá de la injurmación, la sociedá global, con toa la su carga homogenizaora. El progresu ha de bebel en la tradición, en la carga de cunucimientu acumulá duranti segluh, esa ehtoria que moh empuja comu una mula tenaz en poh de lo nuevu. El puebru c'orvía lah suh raícih, la su curtura ancehtral, ehtá cundenau a desaparecel, poh ehtah obran com'una amalgama en el imaginariu culehtivu y cohtituyin una juerza motriz que, bien apruvecha, puedi mové muchuh y fantáhticuh molinuh d'agua.

Juntu a Aplex, otrah asociacionih, otrah presonah trebajan y sueñan con proyehtuh que dihnifiquin la muehtra curtura vernácula cumún. Un ejemplu d'eyu eh la Asociación por la Arquitectura Rural Tradicional de Extremadura, ARTE, el presidenti de la cual eh José Luis Martín Galindo, cuyu trebaju por recuperal, cunserval o dijundil lah manifehtacionih arquitectónicah tradiciunalih ehtá dandu mu güenuh frutuh, no en vanu la su labol de cuncienciación ha cuntribuíu a que la Asamblea de la Junta de Extremadura apruebi un plan pa la pruteción legal y la rehtauración de loh chozuh de piedra que tantu abundan en la muehtra comuniá.

La asociación ARTE edita una publicación ehtaciunal, Piedras con Raíces, con el fin de recuperal y prumuciunal loh chozuh de piedra "la construcción rural más represaentativa de Extremadura", según reza unu de loh suh lemah máh certeruh, y otrah cohtrucionih vernáculah comu majáh de cabreruh, pozuh d'agua, lagarih y otrah manifehtacionih induhtrialih o artesanalih en peligru d'ehtinción.

Ehti inviennu ha salíu a la cayi el númiru doci d'ehta publicación ya emblemática y lo haci con criteriu y güen guhtu, comu han viníu haciéndulu en otrah manifehtacionih en pro de l'arquitehtura tradiciunal ehtremeña.

La portá muehtra un paisaji ohcuru con la silueta d'una choza de piedra rompiendu el horizonti en la sagrá hora en qu'el día s'acuehta y loh chozuh ofrecin un cubiju centenariu a loh viajeruh intrépiduh que s'aventuran en poh de loh suh secretuh, en poh de la vía que yevarun l@h campusin@h y ganaer@h que vivían en perfehta armunía con el meyiu y cantaban mientrah laboraban porqui se sentían librih, prutagunihtah de lah suh humirdih víah, artihtah de loh suh sonih y loh suh jueguh o cuhtumbrih tradiciunalih. Rompiendu el negru una cenefa de reondelih muehtra unah cuantah chozah d'unah cuantah regionih ehtremeñah y por embaju la leyenda con el títulu principal: "La Asamblea de Extremadura tutela a los chozos de piedra".

En la cuntraportá suelin aparecel loh actuh que la Asociación ARTE ha realizau o en loh c'ha participau en loh mesih prejedentih. En ehta ucasión ehtá dedicá a la presentación d'una rivihta dedicá a lah chozah c'hay en la serranía de El Torno, un puebru serranu del Vayi'el Jerti. José Luis Martín Galindo presentó el actu juntu a Alberto Rubio, presidenti de la Asociación de Jóvenes del Valle del Jerte, y Elena Nieto Serrano, miembru de l'equipu c'ha realizau el censu de lah chozah y la rivihta.

El tema principal de la rivihta Piedras con Raíces ehtá edicau a la Proposición no de Ley para la cunservación de lah chozah de piedra c'ha aprovau la Junta de Extremadura. Se repruduci el tehtu de la intirvinción del Diputau José María Rodríguez en el Plenu de la Asamblea de Extremadura en el que s'aprubó la PNL.

Javier Marcos Arévalo firma un artículu, ehcritu en 1982, dedicau a l'arquitehtura pupulá ehtremeña, dece un puntu de vihta antrupulógicu. Moh ofreci el artículu una visión del hábitat y el meyiu físicu que alberga lah chozah de piedra asín comu el refleju cultural que proyehta la vivienda pupulá.

contraportada

José Maldonado Escribano ehtudia en el su artículu loh ehpaciuh dedicauh al curtu religiosu en angunuh cortijuh de la pruvincia de Badajoz: ermitah, capiyah y oratoriuh privauh. Arquitehtura residencial y fervor religiosu iban de la manu dece loh tiempuh de la limpieza de sangri.

Carlos Bermejo moh acerca a lah puertah y ventanah propiah de l'arquitehtura tradiciunal de Valencia de Alcántara, ciudá amurayá que cunserva un gran númiru de portáh góticah de granitu. Hacia 1845, Madoz señala en el su ehtudiu y censu de loh puebruh ehtremeñuh que Valencia de Alcántara "cuenta dentro de su casco 800 casas, todas de mampostería y de dos pisos, siendo muy de notar que todavía se conservan 280 portadas árabes y exactamente uniformes en ojiva". Lah ventanah y cornisah de granitu cumpletan la fachá de la casa tradiciunal valenciana.

En la seción Puerta Abierta apaejin doh artículuh, el primeru ehtá dedicau a loh canastros galleguh de la pruvincia de Lugo, en otruh larih tamién cunucíuh comu hórreos. El articulinu ehtá ehcritu en gayegu, anqui la su lehtura y cumpresión eh senciya pa un ehtremeñu, comu poemuh vel en unu de loh pasajih del final:

" Os canastros forman parte do nosso património rural, encerram uma arte e um saber dignos de admirar, sao a memória viva duma forma de trabalhar, de produzir e de consumir. Sao a parte vital desse círculo virtuoso de sementeira colheita armazenamento e conservaçao do milho."

Michel Rouvière moh ofreci un relatu sobri lah cohtrucionih en piedra seca de Ardèche (Francia) y la impurtancia de la ehtética en la su cohtrución, en cuncretu, la impurtancia de "las representaciones visuales y literarias en los paisajes de Ardèche". Beyuh tehtuh de autorih cunsagrauh acumpañan a lah afotuh de lah diferentih manifehtacionih arquitehtónicah d'esa región francesa, comu el fragmentu de Roger Caillois, ehtraíu del su libru La escritura de la piedra, 1970:

Escritura de piedras, estructura del mundo.

"La visión que el ojo graba es siempre pobre e incierta. La imaginación la enriquece y la completa con los tesoros del recuerdo, del saber, con todo lo que deja a su discreción la experiencia, la cultura y la historia, sin contar lo que, ella misma, si es preciso inventa o sueña. Tampoco se apura jamás por volverse abundante y despótica hasta quedarse casi ausente."

La rivihta Piedras con Raíces moh ufreci en'esti númiru la bibliografía cunucía sobri loh chozuh ehtremeñuh:

MARTÍN GALINDO, José Luis: Os choçus manhegus. Editora Regional de Extremadura. Mérida, 1996.

MARTÍN GALINDO, José Luis: Os choçus, os chafurdôs, una manifestación do fenômenu cultura do Val de Xálima. Revista ALCÁNTARA, Nº 38, IV época, Mayo-Junio de 1996. Institución Cultural El Brocense, Diputación de Cáceres.

MARTIN GALINDO, José Luis: Os chafurdôs do Val de Xálima. ACTAS DEL I CONGRESO NACIONAL DE ARQUITECTURA RURAL TRADICIONAL EN PIEDRA SECA, Vol. II. Servicio de Publicaciones de la Diputación de Albacete, 2002.

GARCÍA ARROYO, Julio: Bóvedas del Valle del Ambroz. Hervás, 2002.

BERNABÉ SALGUEIRO, Alberto: Una arquitectura extremeño-andaluza singular: las torrucas. PIEDRAS CON RAÍCES. 1ª Monografía de Estudios de ARTE. Diputación de Cáceres, 2003.

PULIDO, Fernando J.: Notas sobre los chozos y otras viviendas temporales del entorno de Monfragüe. PIEDRAS CON RAÍCES. Monografía de Estudios de ARTE. Diputación de Cáceres, 2003.

BARROSO GUTIERREZ, Félix: Construcciones campestres en el paisaje agropastoril de la cuenca media del Alagón. PIEDRAS CON RAÍCES. Monografía de Estudios de ARTE. Diputación de Cáceres, 2003.

MARTIN GALINDO, José Luis: A singulariai dos chafurdôs do Val de Xálima. PIEDRAS CON RAÍCES. Monografía de Estudios de ARTE. Diputación de Cáceres, 2003.

DIAZ AGUILAR, Antonio Luis: Los chozos de pastores en la campiña de la Comarca de Tentudía: una arquitectura desaparecida y presente. ARQUITECTURA POPULAR EXTREMEÑA. 2a Monografía de Estudios de ARTE. Departamento de Publicaciones de la Diputación de Badajoz, 2004.

BLANCA PECERO, Juan Antonio: Chozos en el término municipal de Fuente del Maestre. ARQUITECTURA POPULAR EXTREMEÑA. 2ª Monografía de Estudios de ARTE. Departamento de Publicaciones de la Diputación de Badajoz, 2004.

GALINDO MENA, Julio, MUNOZ CASTRO, Mª Dolores: "Bujardas " en el termino de Llerena: manifestaciones de la arquitectura popular. ARQUITECTURA POPULAR EXTREMEÑA. 2ª Monografía de Estudios de ARTE. Departamento de Publicaciones de la Diputación de Badajoz, 2004.

LEDESMA CUEVAS, Juan: El chozo típico extremeño, una alternativa del turismo rural. PIEDRAS CON RAÍCES, Nº, primavera 2003. 

DIAZ AGUILAR, Antonio Luis: Buhardas y majadas terrizas en la sierra occidental de la comarca de Tentudía. PIEDRAS CON RAÍCES, Nº 5, primavera 2004. 

MARTIN GALINDO, José Luis: As malhâs da serra de Xálima. PIEDRAS CON RAÍCES, Nº 6, verano 2004.

ARTE: El chozo extremeño, singular testimonio de nuestra cultura. Medidas para su protección y conservación. PIEDRAS CON RAICES, Nº 7, otoño 2004.

RODRIGUEZ ARROYO, Jesús Carlos: Primera catalogación de los chajurdonis acebanos. PIEDRAS CON RAÍCES, Nº 9, primavera 2005.

GARRIDO CORREAS, Antonio: Los chozos de la Sierra (La Vera). PIEDRAS CON RAICES, Nº 9, primavera 2005.

MUÑOZ REGADERA, Pablo: Las chozas de la Sierra de El Torno. PIEDRAS CON RAICES, Nº 11, otoño 2005. 

MUÑOZ REGADERA, Pablo: Vivienda tradicional en la Sierra de El Torno. Chozas, chozos, majadas y chozuelos. El Torno, noviembre de 2005.

 

La rivihta se dihtribuyi dece la Diputación de Badajoz a toah lah bibliutecah de lah doh pruvinciah ehtremeñah, asín que toh/ah lah presonah interesáh en la muehtra curtura vernácula y en ehpecial en la arquitehtura d'origin tradiciunal tienin un güen motivu pa acudil a esuh recintuh tan mimauh en Ehtremaura, a lah bibliutecah públicah que hay hahta en loh puebrinuh máh chequininuh. Siguru que dihfrutarán con loh conteníuh que moh ofreci Piedras con Raíces.

Febrero 2006

index

Última actualización: 12/12/2006