MARABAJAS (3)
DÁNDULI PALIQUI
AL PICU
COSAS DE ÉL:
LA LUNA LA OTRA
NOCHI
La luna la otra
nochi
s’ha despromáu
y en metá del
regatu
s’ha escachurráu.
¡Vaya una luna,
que no aguanta
el jocicu
de la mi mula!
SI ME QUIERIS,
DÍMILU
Si me quieris
dímilu,
sino dimi que me
quiti,
que no creas que
me peta
pegalti a ca
istanti envitis,
supiendu que tú
por otru
mentris tantu te
derritis.
Qu’anque me peti
muchu
que m’agasajis,
tamién me puéu
dal solu
yo un homenaji.
COSAS DE ELLA:
SI POLQUE ME
QUIERIS MUCHU
Si polque me
quieris muchu
yo te tengu que
querel,
mira con tientu,
Manolu,
lo que vamus a
jadel.
Tu eris
largu, dergaininu,
y, anque
féu, postineru.
Yo soy mona,
peru chica,
más bien pava y
sin saleru.
Sé que piensas
qu’es posibri
casal lo güenu
de bambus
y que mos sargan
los hijus
artus, graciosus
y guapus.
Peru cavila con
carma:
créu que
debiamus dejal-lu
y buscal tú
novia lista,
y precural yo un
tíu guapu.
No sacuentu que
mos pasi
comu a los dos
del jumentu,
y mos sargan los
dagalis
pasmáus, canijus
y féus.
COSAS ‘E DAMBUS
SI QUIERIS QUE
TE QUIERA
ELLA
Si quieris que
te quiera,
zapateritu,
me jacis unas
botas
con taconitus.
ÉL
Si quieris que
te quiera,
costurerita,
me repurgas el
rotu
de la levita.
ELLA
Si quieris que
te quiera,
mocitu guapu,
me ties que
jacel gratis
tos los zapatus.
ÉL
Si quieris que
te quiera,
mocita helmosa,
me ties que
jacel gratis
tú a mí otra
cosa.
ERIS
ÉL
Eris comu el
raminu
de l’arbejaca.
Cuasi tuitus te
güelin,
ni unu te cata.
ELLA
Eris com’una
jara
con repipionis.
Quien te besa
s’enllena
‘e
repegotonis.
ÉL
Eris comu la
mora
qu’está maúra.
Quien te preba
lo pringas
d’enlobaúra
ELLA
Eris comu los
jigus
d’una chumbera.
Quien s’arrima
s’espina
la bigotera.
ÉL
Eris comu una
breva
que van pimpandu.
Siempri quieru
comelti,
nunca sé cuandu.
COSAS ‘E PADRI:
NO T’HE TRAÍU LA
LUNA
¡No t’he traíu
la luna,
chirivejinu,
polque me jizu
bulra
pol to’l caminu!
Yo ansomaba la
gaita
dendi la mula
y ella
s’agazapaba,
la mu so tuna,
detrás de los
pinaris,
detrás del monti,
dembaju ‘e los
castañus,
pa entri los
robris...
Luegu en la
regatera
qu’hay más
p’alantri
s’abajó de los
pinus
pa allí
bañalsi.
Y yo, dendi la
mula,
la estaba
viendu
comu
tuitus los pecis
la iban
mordiendu.
La
jicierun cachinus
chirriquininus
y le tiraban
brincus
y bocaínus.
Peru confolmi el
unu
la esparramaba,
el otru con la
cola
l’arrejuntaba.
Aluegu
s’aburrierun
y la dejarun
a la luna solina
en aquel remansu.
¡No te la traigu,
que la mula no
quisu
pisal el charcu!
COSAS ‘E MADRI:
NANA DE LA LOBA
Duélmite,
chirivejinu,
no te dispiertis
ahora,
que pa esus
montis escurus
va aguarreandu
una loba.
Duélmite,
sentrañas mías,
no te me pongas
jergosu,
que la loba va
dijendu:
¿Óndi esta esi
niñu helmosu?
Duélmite, rey de
mi casa,
no piponéis más,
cravel,
que la loba está
a la puerta
y es que te
quieri comel.
Duélmite,
chirriquininu,
deja de jadel
pucherus,
qu’a la loba, si
s’arrima,
l’ajundu yo en
el braseru.
